February 20, 2012

༄༅། །བོད་རྒྱལ་ལོ་ ༢༡༣༩ རབ་གནས་ཆུ་འབྲུག་ལོའི་གནམ་ལོ་གསར་ཚེས་ལ་གཞིས་བྱེས་བོད་མི་ཡོངས་ལ་བཀའ་ཤག་ནས་འཚམས་འདྲི་ཡོད། ཚང་མས་མཁྱེན་གསལ་རེད། དེ་སྔོན་འབོད་སྐུལ་ཞུས་པ་ལྟར་ད་རེས་ལོ་གསར་སྐབས་ཆོས་ཕྱོགས་དང་སྲོལ་རྒྱུན་གྱི་བྱེད་སྒོ་ཁག་ལས་དགའ་སྤྲོ་དང་ཐུགས་སྤྲོའི་རིགས་མ་གནང་རོགས་ཞེས་ཞུས་པ་རེད། དམིགས་བསལ་ད་ལྟའི་ཆར་གནས་ཚུལ་གོ་བར་གཞིགས་ན་བོད་ནང་ས་ཕྱོགས་གང་སར་དམག་མི་འབོར་ཆེན་གཏོང་བཞིན་ཡོད་པ་དང་། ཕྱི་རྒྱལ་མི་སྣ་བོད་ནང་འགྲོ་མ་བཅུག་པ། གསར་འགོད་པ་ཡང་འགྲོ་ཆོག་གི་མེད། དེ་བཞིན་རྒྱ་རིགས་ཡུལ་སྐོར་སྤྲོ་འཆམ་པ་ཚོར་ཡང་དམ་བསྒྲགས་ཀྱིས་མི་ཉུང་ཤས་ཤིག་ལས་འགྲོ་ཆོག་གི་མེད་པ་འདྲ། གནས་སྟངས་འདི་འདྲའི་འོག་བོད་ནང་གནས་ཚུལ་གང་འདྲ་ཆགས་ཡོང་སྙམ་སེམས་འཚབ་ཤུགས་ཆེན་པོ་ཞེ་དྲག་འདུག དེར་བརྟེན་ལོ་གསར་རིང་ཚེས་ ༣ དང་། ཚེས་ ༨ ཚེས་ ༡༠ ཚེས་ ༡༥ བཅས་ལ་བྱུང་ན་དགོན་སྡེ་ཁག་ལ་ཕེབས་ཏེ་ཆོས་ཕྱོགས་ཀྱི་ལས་འགུལ་སྤེལ་ནས་བོད་ནང་བཞུགས་པའི་བོད་མི་ཚོར་སྨོན་འདུན་གནང་རོགས་ཞེས་རེ་འདུན་ཞུ་རྒྱུ་ཡིན།
Visit for more details: http://tibet.net/tibetan/

Share with your friends










Submit